انصار: (د لیندۍ ۱۷ مه)، یو شمېر پخوانیو افغان مشرانو، چې له هیواده بهر اوسي، پرون (جمعه) په یوه انلاین یا مجازي غونډه کې د یوه نوي ايتلاف د جوړېدو اعلان وکړ.
پخواني قوماندانان، تنظیمي مشران او سیاستوال لکه عبدالرشید دوستم، محمد اسماعیل خان، کریم خلیلي، محمد محقق، عبدالرب رسول سیاف، یونس قانوني، عطامحمد نور، صلاح الدین رباني، عبدالحق شفق، صادق مدبر، سرور دانش، احمد مسعود، رحمت الله نبیل، عمر داوودزی او تادین خان د دغه نوي ایتلاف عمده مشران دي.
د افغانستان د ژغورنې لپاره د ملي شورا په نوم د دې نوې ټلوالې هدف د هېواد د روان بحران حل او د طالبانو د واکمنۍ مخالفت بلل شوی دی.
دوی په خپله مجازي غونډه کې وویل چې په خپل منځ کې به هڅې همغږي کړي، افغانستان به له اوسني کړکېچ څخه راوباسي، او د طالبانو د واکمنۍ پر وړاندې به یو ګډ دریځ وړاندې کړي.
دوی په دې اړه چې په څه ډول به د طالبانو اوسنۍ واکمني وننګوي، څه نه دي ویلي. دا په داسي حال کې ده چې تر دې وړاندې د دغو قوماندانانو او تنظیمي مشرانو اکثریت په ترکیه کې د افغانستان د مقاومت د عالي شورا په نوم یو تشکیل درلود.
خو د افغانستان د ژغورنې لپاره ملي شورا وايي چې د دې نوي ایتلاف په جوړولو سره یې له ۲۰۲۱ څخه، چې طالبان بیا واک ته رسیدلي دي، د طالبانو د واکمنۍ په وړاندې تر ټولو مهم او پراخ ایتلاف رامنځته کړی دی.
د طالبانو افراطي او د ولس بېزاروونکو اقداماتو دې ډول ايتلافونو ته د پرمختګ لاره هواره کړې خو څرګنده نه ده چې کوم سیمه ییز او نړیوال قدرت به یې ترڅنګ ودریږي او که نه. د افغانستان د معادلو په بدلولو کې د بهرنیو هیوادونو رول ډېر اغېزمن بلل کېږي. په دې ائتلاف کې لسګونه وړې ډلې برخه لري.
URL تعقيب: https://www.ansarpress.com/pashto/34716
